Rais Mwinyi Atoa Pole Kifo cha Lukuvi, Asema Ni Pigo Kubwa kwa Taifa

2026-03-25 - 12:03

Rais wa Zanzibar na Mwenyekiti wa Baraza la Mapinduzi, Hussein Ali Mwinyi, ametoa salamu za pole kufuatia kifo cha William Vangimembe Lukuvi kilichotokea leo Machi 25, 2026. Kupitia taarifa iliyotolewa na Ikulu Zanzibar, Rais Mwinyi amesema taifa limepoteza kiongozi muhimu ambaye amelitumikia kwa uadilifu na kujitolea katika nafasi mbalimbali za uongozi kwa muda mrefu. Rais Mwinyi amebainisha kuwa atamkumbuka Lukuvi kwa mchango wake mkubwa katika maendeleo ya nchi, akimtaja kama kiongozi mzoefu na mzalendo aliyeweka mbele maslahi ya taifa katika utekelezaji wa majukumu yake. Amesema kifo hicho ni pigo kubwa si tu kwa familia na wapiga kura wa Jimbo la Ismani, bali kwa Watanzania wote kwa ujumla kutokana na nafasi alizozishika katika uongozi wa nchi. Katika salamu zake, Rais Mwinyi ametuma pole kwa Rais wa Jamhuri ya Muungano wa Tanzania, Samia Suluhu Hassan, Spika wa Bunge, familia ya marehemu, ndugu, jamaa na marafiki, pamoja na wananchi wa Jimbo la Ismani na Watanzania wote. Amesema Serikali ya Mapinduzi ya Zanzibar inashiriki katika maombolezo hayo na inaungana na wananchi katika kipindi hiki kigumu cha msiba. Rais Mwinyi amehitimisha kwa kuwataka wananchi kuwa na subira na uvumilivu katika kipindi hiki cha majonzi, huku akimuombea marehemu apumzike kwa amani. Kifo cha Lukuvi kinaacha pengo kubwa katika uongozi wa nchi kutokana na uzoefu wake na mchango wake wa muda mrefu katika siasa na utumishi wa umma nchini Tanzania.