Kiongozi wa Zamani Nepal Akamatwa Kufuatia Vifo vya Maandamano ya Gen Z

2026-03-29 - 03:05

Aliyekuwa Waziri Mkuu wa Nepal, K. P. Sharma Oli akiwa na Polisi. Kathmandu, Nepal – Aliyekuwa Waziri Mkuu wa Nepal, K. P. Sharma Oli, amekamatwa na mamlaka za nchi hiyo kufuatia uchunguzi unaohusiana na vifo vya watu 76 vilivyotokea wakati wa maandamano makubwa ya vijana wa kizazi cha Gen Z yaliyofanyika Septemba mwaka jana. Oli amekamatwa pamoja na aliyekuwa Waziri wa Mambo ya Ndani, Ramesh Lekhak, wakituhumiwa kwa uzembe wa kushindwa kuchukua hatua za haraka kuzuia vurugu zilizosababisha umwagaji damu huo. Maandamano hayo yalichochewa na hasira ya vijana dhidi ya rushwa na uongozi mbovu, yakigeuka kuwa machafuko makubwa ndani ya siku mbili mfululizo. Ripoti ya tume maalum ya uchunguzi imebaini kuwa matumizi ya nguvu kupita kiasi dhidi ya waandamanaji yalichangia vifo hivyo, huku angalau watu 19 wakipigwa risasi siku ya kwanza pekee. Tume hiyo pia ilieleza kuwa K. P. Sharma Oli alishindwa kuingilia kati kwa wakati ili kuzuia matumizi ya nguvu hizo. Kwa mujibu wa msemaji wa polisi, Om Adhikari, viongozi hao wanashikiliwa katika Kituo cha Polisi cha Kathmandu na wanatarajiwa kufikishwa mahakamani. Balendra Shah akiapishwa kuwa Waziri Mkuu mpya wa Nepal. “Tumewakamata kwa kuzingatia mapendekezo ya tume ya uchunguzi,” alisema Adhikari. Hata hivyo, wakili wa Oli, Tikaram Bhattarai, amepinga hatua hiyo akisema kuwa haina msingi wa kisheria na inalenga kisiasa zaidi. Baada ya kukamatwa, Oli mwenye umri wa miaka 74 alipelekwa hospitalini kwa uangalizi wa kitabibu, kufuatia historia yake ya upandikizaji figo mara mbili. Kukamatwa huku kunakuja siku moja tu baada ya Balendra Shah kuapishwa kuwa Waziri Mkuu mpya wa Nepal, kufuatia ushindi mkubwa wa chama chake uliosukumwa na hasira ya wananchi dhidi ya vifo vya waandamanaji. Taswira Mpya ya Uwajibikaji Tukio hili linaashiria mwelekeo mpya katika siasa za Nepal, ambapo viongozi wa juu wanawajibishwa moja kwa moja kwa maamuzi yao, hasa wakati wa migogoro ya kitaifa.