Donald Trump Akosolewa na Mshauri wake Kuhusu Vita na Iran

2026-03-17 - 04:27

Mmoja wa washauri wa karibu wa Rais wa Marekani, David Sacks, amemkosoa hadharani Donald Trump kuhusu vita vinavyoendelea dhidi ya Iran, akionya kuwa mzozo huo unaweza kuongezeka na kusababisha hatari ya matumizi ya silaha za nyuklia. Sacks, ambaye ni mshauri wa Trump anayeshughulikia masuala ya akili bandia (AI) na sarafu za kidijitali, alisema kuwa Israel inaweza kuwa inafikiria uwezekano wa kutumia silaha za nyuklia iwapo vita vitaendelea kuongezeka dhidi ya utawala wa Iran. Akizungumza kwenye podikasti ya All‐In Podcast, Sacks alionya kuhusu hatari ya hatua za kijeshi zinazoendelea kuongezeka. “Israel inaweza kuharibiwa vibaya sana, na hapo ndipo kunapokuja hatari ya kuongeza kiwango cha vita kwa kufikiria kutumia silaha ya nyuklia,” alisema. Sacks pia alimshauri Trump kutafuta njia ya kumaliza mgogoro huo kwa haraka, akisisitiza kuwa ni wakati mzuri wa kutangaza ushindi na kujiondoa katika mzozo huo. “Ni wakati mzuri kutangaza ushindi na kuondoka. Tunapaswa kutafuta njia ya kutoka katika hali hii,” aliongeza. Kwa mujibu wa Sacks, Marekani tayari imeweza kudhoofisha uwezo wa kijeshi wa Iran kwa kiasi kikubwa, hivyo kuongeza vita kunaweza kuleta hatari zaidi kwa usalama wa dunia. Kauli hiyo imeibua mjadala mkubwa ndani ya kambi ya makamu wa rais JD Vance, huku ikimfanya Sacks kuwa afisa wa ngazi ya juu zaidi katika Ikulu ya Marekani ambaye amejitokeza hadharani kupinga msimamo wa Trump kuhusu vita hivyo.